भोजपुर । भोजपुर र संखुवासभालाई जोड्ने अरुण नदीको लम्सुवाघाटमा निर्माण भईरहेको पक्की पुल १४ वर्षदेखि अलपत्र छ ।करिव चार करोड खर्च भएपछि पुल २०६७ सालबाट निर्माण थालिएकोमा अझै सम्पन्न नभएको षडानन्द ६ का वडाध्यक्ष सुमन विसुन्केले बताए ।

‘पुल निर्माणको काम १४ वर्षबाट अलपत्र छ,’ वडाध्यक्ष विसुन्केले भने, ‘राज्यको करिव चार करोड खर्चपछि काम अलपत्र पारिएको अवस्था छ ।’ यो पुल बनिदिए स्थानीयबासीलाई राहत हुने उनको भनाइ छ ।

अरुणमा १७२ मिटर लामो पक्की पुल निर्माणका लागि काम थालिएको थियो । निर्माण कम्पनीले २०६७ सालदेखि पुल निर्माण सुरु गरेको थियो । सम्झौता अनुसार पुल २०७० सालमा सक्नुपर्नेमा निर्माण कम्पनीले काममा ढिलाई गरेपछि राज्यको तर्फबाट ठेक्का रद्द गरिएको सडक डिभिजन कार्यालय तुम्लिङटार प्रमुख शुभाञ्जन दाहालले जानकारी दिए ।

प्रकाशित मिति: २०२५-०२-०६ , समय : ०७:२५:५५ , ७ महिना अगाडि